३ मंसिर २०८०, काठमाडौं, छठ पूजाको मुख्यदिन आज अस्ताउँदो सूर्यलाई अर्ध्य  दिइ तराई, मधेस ,काठमाडौं  उपत्याका लगायत देशका बिभिन्न भागमा  मनाइयो ।

         कार्तिक शुक्ल चतुर्थीदेखि सप्तमीका दिनसम्म  जलासय,नदी तथा पोखरीको किनारमा सूर्यदेवता र छठीमाताको श्रद्धा एवं भक्तिपूर्वक  पूजा आराधना गरी  यो पर्व मनाइन्छ ।  अस्ताउँदो सूर्यलाई अर्ध्य  दिएर पूजा आराधना गरी  बर्तालुले आज रातभर जाग्राम बसि भोलि बिहान उदाउँदो सूर्यलाई विधिपूर्वक अर्ध्य दिएपछि यो पर्व समापन हुन्छ ।

     विगतमा मुख्यगरी तराई, मधेस  क्षेत्रमा मात्र मनाइने यो पर्व पछिल्लो समय  सास्कृतिक अन्तरघुलनका कारण काठमाडौँ उपत्यकालगायत पहाडी तथा हिमाली जिल्लामा समेत  श्रद्धा एवं भक्तिपूर्वक मनाउने प्रचलन बढ्दै गएको पाइन्छ ।

  काठमाडौं उपत्यकाका गुह्येश्वरी, गौरीघाट, कमलपोखरी, कुपण्डोललगायत स्थानमा छठ पूजास्थल निर्माण गरी ध्वजापताकाले सिङ्गारिनुका साथै रंगबीरंगी बत्तिले  झिलीमिली पारेपछि गुह्येश्वरी, गौरीघाट, कमलपोखरी क्षेत्र अझ उल्हासमय देखिएको छ ।

      छठको व्रत विधिपूर्वक सम्पन्न गर्नाले मनोवाञ्छित फल पाइने, परिवारको कल्याण हुने, आफ्ना सम्पूर्ण दुःख र कष्ट हटेर जाने जनविश्वासका कारण यो पर्व मनाइन्छ । यो पर्वमा छैठी माताको पूजाअर्चना गरी पुत्र, पति र परिवारको कल्याणको कामना गरिन्छ ।